Torre e Fortaleza do Castro

Esta construción medieval, cuxa torre data do século XV, foi erixida sobre un antigo castro, do que recentemente se atoparon algúns restos. O antigo castelo foi destruído durante as invasións irmandiñas e sufriu varias reformas. Chegou a utilizarse como cárcere no século XVIII e coa supresión dos señoríos no século XIX caeu en desuso, chegando a un estado de abandono e ruína.

O conxunto arquitectónico, composto por fortaleza e torre, foi declarado Ben de Interese Cultural (BIC) en 1994, coa categoría de Monumento. Nese mesmo ano pasou a ser propiedade do Concello do Barco de Valdeorras que, posteriormente, levou a cabo unha profunda rehabilitación deste complexo patrimonial e arquitectónico.

Na actualidade, este espazo atópase aberto ao público e alberga no seu interior unha exposición composta por paneis informativos onde se conta a historia deste espazo, así como o seu papel dentro do desenvolvemento do municipio e do conxunto da comarca. Dende o alto da torre pódese gozar dunha fantástica vista da contorna.