Pincheira de A Fervenza (Portomao)

Localizada moi próxima ao lugar de Fervenza, esta fervenza ten unha caída duns 25 metros de altura. Este espazo natural caracterízase pola súa gran beleza, representada por un salto de auga que cae sobre unha parede de lousa cuberta de fentos.

Para acceder a ela, existen varias posibilidades. Unha delas levarache ata o lugar de Fervenza dende onde hai que camiñar algo máis de 4 quilómetros (ida e volta) por un carreiro, cun percorrido de dificultade baixa, que che guiará por fermosas paraxes ata alcanzar este enclave. Outro dos itinerarios, duns 14 quilómetros (ida e volta), comeza na Área Recreativa do Salgueiral no Barco. Dende aquí, deberás seguir a sinalización da Vía Nova para chegar ata Arnado onde verás un singular castelo. Continuando cara á Pincheira, atravesarás campos de viñedos e subirás ata o miradoiro da Fervenza para despois acceder a este salto de auga.