Pena Trevinca

Pena Trevinca é o pico por excelencia de Galicia, o punto máis alto da Comunidade Autónoma con 2127 metros de altitude. Atópase nos Montes de Trevinca, un exuberante espazo natural protexido pola Rede Natura 2000 que forma parte da Serra de Segundeira, ao leste da provincia de Ourense e limitando coa provincia de Zamora, en Castela e León.

O 19 de xuño de 2008, segundo decreto 131/2008, declárase Zona de Especial Protección de Aves (ZEPA), cunha superficie de 22.510 ha., unha zona de alta montaña que constitúe un macizo montañoso rodeado de vales de orixe glaciar, que corresponde a un dos mellores ecosistemas subalpinos de Galicia.

Nestas montañas, nas que apenas se aprecia a pegada humana, o visitante atopará paisaxes subalpinos con picos nevados durante o inverno, lagoas glaciares como as de Ocelo ou A Serpe, fermosos ríos como o Xares ou o Bibei, fauna e flora protexida e outros dous cumes que superan os 2000 metros de altitude: Pena Negra (2123 m) e Pena Survia (2122 m).

O Macizo de Trevinca ofrece un espectáculo único de flora e fauna. A súa vexetación similar á das serras galaico-castelás, sorprenderache coas súas formacións de Drosera Rotundifolia nos prados das turberas, endemismos vexetais como a Genista Sanabrensis nas alturas, ou as coníferas como os enebros nos vales superiores.

O mellor acceso a Pena Trevinca realízase dende a localidade da Veiga, a través de pequenas aldeas que se aproximan ao espazo montañoso, como Xares, Vilanova ou A Ponte, aínda que tamén é posible facelo dende outros puntos, nos municipios veciños de Carballeda ou Viana do Bolo, ou dende a vertente zamorana.