Centro astronómico de Trevinca

En 2015 as montañas da Veiga foron declaradas como Destino Turístico Starlight, un dos mellores lugares do mundo para observar as estrelas. E é precisamente nestas montañas onde se atopa o Observatorio astronómico de Trevinca, un impresionante espazo inaugurado en 2021 na parroquia de Valdín, a case 1.300 metros de altitude.

O observatorio dispón dun telescopio Ritchey Chretien robótico equipado con dous refractores apocromáticos de 100 e 150 milímetros, que permite recoller incribles fotografías nocturnas de forma totalmente autónoma para a investigación científica. Conta tamén cun telescopio solar de altísima calidade e catro telescopios Dobson para a observación visual.

Para completar a experiencia dos visitantes, o Centro astronómico dispón dun planetario 4K para divulgar o firmamento, varias salas expositivas e mesmo un simulador de voo. Máis aló dos espazos abertos ao público, durante o ano organízanse no centro e na oficina municipal da Veiga, diferentes actividades con aforo limitado que requiren de reserva previa na súa páxina web.